థియేటర్లలో కుమ్మేసింది... ఇక ఓటీటీలోకి వస్తున్న 'రాకాస'

యువ నటుడు సంగీత్ శోభన్, నయన్ సారిక జంటగా నటించిన హారర్ కామెడీ చిత్రం ‘రాకాసా’ ఓటీటీలో సందడి చేసేందుకు సిద్ధమైంది. ఇటీవలే థియేటర్లలో విడుదలై మంచి విజయాన్ని అందుకున్న ఈ సినిమా, ప్రముఖ ఓటీటీ ప్లాట్‌ఫామ్ నెట్‌ఫ్లిక్స్‌లో మే 1 నుంచి స్ట్రీమింగ్ కానుంది.

ఏప్రిల్ 3న థియేటర్లలోకి వచ్చిన ఈ చిత్రం బాక్సాఫీస్ వద్ద మంచి వసూళ్లు రాబట్టింది. సుమారు రూ.15 కోట్ల బడ్జెట్‌తో తెరకెక్కిన ‘రాకాసా’, రూ.27 కోట్లు వసూలు చేసి లాభాల బాట పట్టింది. హారర్, కామెడీ అంశాలు కుటుంబ ప్రేక్షకులను బాగా ఆకట్టుకున్నాయి. ఒక ప్రాచీన బ్రహ్మ రాక్షసుడి శాపం, దానికి ముడిపడిన గ్రామస్థుల కథతో ఈ సినిమా రూపుదిద్దుకుంది.

మనస శర్మ ఈ చిత్రంతో దర్శకురాలిగా పరిచయమయ్యారు. వెన్నెల కిశోర్, బ్రహ్మాజీ, తనికెళ్ల భరణి, గెటప్ శ్రీను వంటి ప్రముఖ నటులు కీలక పాత్రల్లో నటించారు. నిహారికా కొణిదెల, ఉమేష్ కుమార్ బన్సల్ ఈ చిత్రాన్ని నిర్మించారు.

ఈ చిత్రం తెలుగుతో పాటు తమిళం, హిందీ, కన్నడ, మలయాళ భాషల్లోనూ ఓటీటీ వేదికపై అందుబాటులోకి రావొచ్చని ప్రచారం జరుగుతున్నప్పటికీ, దీనిపై అధికారిక ప్రకటన వెలువడాల్సి ఉంది. థియేటర్లలో ప్రేక్షకులను భయపెట్టి, నవ్వించిన ఈ సినిమా ఓటీటీలోనూ అదే స్థాయిలో ఆకట్టుకుంటుందని చిత్రబృందం ఆశిస్తోంది.